Listen Now: 
Paarengarenga
He ngarohanga puutea, he hekenga roimata.
E mea ana a kaiwhakawaa David Ambler o te Kooti Whenua Maori tokowhaa nga mema o te roopu Paarengarenga 3G Trust kua peia na te kitenga i te ngarohanga o te puutea nui i te tau kotahi muri tata mai i te kuhunga o te tokowhaa ki tera tarahiti.
Kua totokangia a ratou kaute puutea otiraa ko te nui o te moni a tena, a tena o ratou i te whare puutea e takoto ana.
Tooku whenua
Kua whakatuuria tetahi waahi ipurangi hou ko My Whenua te iingoa hai aawhina i te tini manomano o nga Maori huri noa ki te whakahaere i o ratou whenua ki runga ipurangi.
Koia te kaupapa kua whakaritea e te Tumu Paeroa te tari tiaki i nga whenua Maori.
Hai taa Jamie Tuuta te toihau o te Tumu Paeroa koia te tuatahitanga o nga hotaka pera huri katoa i te motu.
Te tikanga kia whiwhi ratonga te 70 mano kaipupuri whenua Maori.
Metiiria Turei
He whakatau maarohirohi kia whakataetae a Nanaia Mahuta mo te rangatiratanga o te roopu Reipa.
Hai taa Metiiria Tuurei o nga Kaakaariki he wahine huumaarika a Nanaia, he whaea aa kua whakaririkatia a ia e te roopu Reipa i roto i nga tau.
Hai taa Tuurei ano he wahine maahaki a Nanaia kua whakaaturia e ia kei roto ia i te whare paaremata mo te roanga o te hiikoi pau te kaha.
Ka whiriwhiri a Reipa i to ratou rangatira hou a tera marama.
Ebola
He kino nga matapae e paa ana ki te mate ebola me te kii kia tekau mano pea nga taangata hou ia wiki ia wiki ka paangia e taua maauiui akuanei.
Koia te korero a te Kaahui Hauora o te Ao.
Taapiri atu ki tena e matapae ana 70 paiheeneti o nga tuuroro katoa ka mate.
Ko te akiaki ki nga whenua whai rawa katoa hai aha i te pakanga me huri kee ki te tautoko i nga mahi ki te whakakore i te maauiui ebola nei…kei marara mai ki te patu i te tini whaaioio.
Outcomes
E tika ana kia kite i nga otinga tauwhaaiti Maori ki tetahi mahere waa roa a te Kaunihera o Taamaki Makaurau.
E waihangatia tonutia ana te mahere utu puutea mo nga tekau e tuu mai nei aa kei te rapu huarahi te Poari Maori o te Kaunihera kia whakapai ake i te ahua o te noho a te Maori ki Taamaki nui.
Kaati i rungi i te whakataunga o nga kaupapa Tiriti o Waitangi i Taamaki Makaurau kua tupu te ahei o te Maori me te Kaunihera ki te mahi ngaatahi ki te whakarite hononga.
Nanaia Mahuta
Kei muri i a Nanaia Mahuta ko te kaahui o nga mema Maori o te roopu Reipa i te tukuna o tana iingoa ki te whakataetae mo te rangatiratanga o tana roopu.
Hai taa Peeni Henare te tiamana o taua kaahui mema Maori ka nui to ratou tautoko ki a Nanaia.
Hai taa Henare ko Nanaia te tautoohito o nga mema Maoriaa he mea nui kia whakamohio atu ki te roopu whaanui e kore te Maori e maatakitaki noa i nga mahi.
Copyright © 2014, UMA Broadcasting Ltd: www.waateanews.com
