Listen Now: 
Kei te tautokohia tonutia.
Kei muri tonu i a David Cuniliffe etahi e tautoko ana i a ia.
Ko Louisa Wall mema paaremata o Manurewa tetahi me tana kii ehara i te mea no Cuniliffe te katoa o te hee mo te hinganga o Reipa i te koowhiringa pooti.
Ki a ia ano i whakaaturia e Cuniliffe he tangata kaha ki te taupatupatu i nga take toorangapuu na reira me titiro te roopu whaanui ki a ratou ano kaua ranei ki tetahi tangata kotahi.
Piriihimana me te iwi.
E tuu ki te kei o te waka, kia paakia koe e nga ngaru o te wai.
Koia te whakataukii i korerohia e Apirana Mahuika o Ngati Porou ki te tari piriihimana he whakaaturanga taua korero o te hiahia kia mahi ngaatahi te Maori ki nga piriihimana
ma reira ka whakatau i nga raruraru, i nga hara, i nga tuukinotanga.
Hai taa Mike Bush kaikoomihana o te tari ko te whakaritenga o tetahi kaitohutohu Maori i te Runanga o Ngati Porou he tohu o te hononga e whakaarahia nei.
Waipiro kore ka tika.
Atu i Wairoa ki te Wairarapa kia maroke te korokoro hai aha i te waipiro.
Ka tuu te hui tuku tohu a Ngati Kahungunu mo nga kaupapa haakinakina a te po o te apopo hai taa tiamana Ngahiwi Tomoana he hui waipiro kore te tikanga.
Hai taana ano kua maarama ki te iwi nga paanga kikino o te waipiro ki etahi puumanawa taakaro i roto i nga tau no reira kua tae ki te waa ki te hiikoi i te korero.
Marama piiataata mai.
Whiti te marama i te po, tiaho iho mai koe.
Kua waimarie a Aotearoa i te po raa te kite ake i te hanga toto o te marama.
Ko te aaraitanga tera otiraa i raarangitia ai ko te marama, ko Papatuuaanuku, ko Tamanuitera.
E kii ana nga tohunga tirotiro whetuu he tino whakaaturanga tera horekau he utu.
Huaraakau kiwi.
Kei te aata whiriwhiri te Kaahui o nga Kaiahuwhenua Kiwifruit me kore ratou e wero i te kaawanatanga ma te ture mo te paanga mai o te mate PSA ki nga huaraakau.
I hui nga kaiahuwhenua Maori inanahi ki Tauranga e whakapae ana e hia kee miriona taara te utu ki a ratou o taua mate.
Hai taa tiamana Neil Te Kani kei te manawapaa nga kaiahuwhenua Maori ki te piki i te waka o nga kaiahuwhenua Paakeha araa kia werohia te kaawanatanga, kia haere ki te kooti ranei.
Momi paipa, me mutu.
Kia piripono ki to whakatau kia mutu ai te kaipaipa.
Hai taa maangai take hauora a Miki Aapiti ehara i te mahi maamaa te tikanga kia uu ki taau e kii taurangi ai ia raa, ia raa ma reira ka mahue ki tahaki ko te tuupeka.
Hai taana ano ko te marama nei o Oketopa te waa tika ki te huri tuaraa ki nga hikareti mo ake tonu atu.
Copyright © 2014, UMA Broadcasting Ltd: www.waateanews.com
RELATED NEWS
