Listen Now: 
No wai te hee?
No te hee mo te noho rawa kore a te tokomaha?
E whakapae ana a Bill English Minita Take Puutea no nga Kaunihera te hee me te ahua o a ratou tikanga whakatau mahere koia te puutake o te raruraru.
Kei te tohu a English i tona ringa ki nga Kaunihera me tana kii na runga i a ratou tikanga whakahaere kua whakapiki i te utu o nga whare huri noa.
Ki a ia ano me whakarerekee i nga tukanga whakariterite ka tika.
Horekau he tautoko
Kiihai te tini o nga Maori i aata tautokohia ki nga pewheatanga pooti.
Koia i tuu ai a Hone Harawira me tana karanga kia kaute ano nga pooti i tana rohe o Te Taitokerau.
Hai taana e kore e taea te kii ka whakarerekeehia te otinga pooti i reira ko tana hiahia kee kia tirohia te ahua o te paanga mai otiraa o te manaakitanga ki nga kaipooti Maori i te waa o te pooti.
Ki a ia me waiho ma te ture hai whakahaere i tetahi kaute tuarua o nga pooti i tana rohe.
Ngai Tahu whai hua.
Kua piki maarika te hua puutea ki a Ngai Tahu mo te tau pahure atu nei ki te 146 miriona taara.
Kua whakarahi ake te kete puutea a te iwi i runga i te whiwhinga o nga utu inehua ruuwhenua me te hokona atu o etahi o a ratou rawa.
Hei taa Trevor Burt te tiamana o Ngai Tahu kua kaha hoki nga mahi hoko whenua, hoko kaimoana, mahinga tuuruhi me etahi atu whakangao puutea.
He momo rongoaa.
Mehemea ka awhi nga rangatahi me nga whaanau i te ao Maori me ona ahuatanga ka whai oranga.
Koia te korero a Carrie Taipari kaikookiri i nga take hauora i te rohe o Hauraki kua aronuitia mo aana mahi nui i te ao hauora Maori.
I whakanuia a ia mo tana tuunga ki te whakatauira i nga ahuatanga whai hua ki nga tuuroro, ki nga tamariki.
Kaati naana hoki i whakarite akoranga ki te whaangai atu i nga puukenga waka ama me nga tikanga Maori ki nga tauira
Te ahua o nga ratonga.
He pehea te mauritau o nga ratonga paapori te paatai o te waa.
Ko te hiahia o te Koomihana Tikanga Mahi kia titiro ki nga ahua o Whaanau Ora no reira ka korero ki nga kaiwhakarato o te kaupapa tae atu ki nga roopu whakahaere e toru.
Kaati kei te huri te aro o te Koomihana ki nga momo tikanga e taea ai te whakamahi mo te tukuna o nga ratonga paapori ki te iwi.
Marama hanga toto.
A te po nei ka kite a Aotearoa i te aaraitanga o te marama ki etahi he marama toto te tuarua o nga marama pera i tenei tau.
Na te rerenga kei muri i a Papatuuaanuku ka kapia te marama e te aataarangi roa o te kuia raa.
Kaati ka whakapaa atu te maarama o Tamanuitera ma te puehu o Papatuuaanuku ka rere ki te marama kaatahi ano ka huri te marama kia whero te ahua penei me te toto te kano.
Tirohia te rangi a muri atu i te iwa karaka a te po nei.
Copyright © 2014, UMA Broadcasting Ltd: www.waateanews.com
RELATED NEWS
