October 07, 2014
Nga tohanga tautoko
Nga tohanga tautoko
Ma te whakatupu hononga ma te rapu huarahi whai hua ka kite i nga painga o te tohanga puutea ahakoa te whaaititanga.
Koia te korero a Merepeka Raukawa Tait tiamana whaanau ora i te Ika a Maaui me tana kii ono miriona taara ka tohaina a nga tau e toru kei te haramai hai haapai i te hootaka Whaanau Ora.
Hai taana ano ka werohia nga ratonga auraki me to ratou ahei ki te tautoko mauritau i te Maori.
Nga whakahou kei te haramai
Tera pea ka whakahou i etahi whakahaere ki te tari Maori o Te Puni Kookiri.
A tera marama ka whakarewa taua tari i to ratou anga hou hai taa Te Ururoa Flavell Minita Whakatupu Kaupapa Maori he whaanui ake te paanga o ana mahi i nga haepapatanga Minita Take Maori o mua.
Kaati ki a ia ko te mea nui ko te tupu me te oranga o te Maori te kaupapa maatamua, te mahere matua hai kookiritanga moona.
Hiko kore
Kua whakakaangia nga raiti me te hiko ki Taamaki Makaurau aa kua tiimata nga korero whakawaa e tirotiro ana ki nga puutake o taua raruraru nui.
85 mano kaainga i tapahia i te Raatapu na runga i te kaapura ki tetahi teihana whakarato hiko.
E mea ana te kamupene whakarato hiko o Vector na te kaha o te ua, o te uawhatu, o te hau he roa atu te waa hai whakatika i nga hee mo te taha ki te hiko.
Hui hauora
I te whakataunga o nga kaupapa Tiriti o Waitangi a nga iwi kua kaha ake te ahei o nga roopu whakahaere a iwi ki te tautoko i o ratou uri.
Koia te korero i te hui nui mo te tirohanga ki te hauora i tenei wiki ki Taamaki Makaurau.
Ko taa te hui kei te whai hua tatou i te waa e whakakaha ana tatou i o tatou hononga ki a tatou ano mehemea ko te oranga o te iwi te whaainga matua koni atu i tera horekau he painga pena mahue ki muri te tokomaha o tatou.
Whare pakaru
He maakuu he paru etahi whare a te tari whare i Porirua.
E mea ana te kaunihera ka nui to ratou hiahia kia whakahoungia era momo whare kia piki te oranga o nga whaanau kei roto.
Hei taa Bill Hiku te tiamana o nga kainoho i Porirua ka noho nga whaanau i nga whare taretare na te mea horekau he whare ano mo ratou.
Kaati, 90 paiheeneti o nga whare i te haapori o Cannons Creek i whakamaatautauhia i te tiimatanga o te tau kiihai i tuutakina nga paerewa tika mo te noho whare.
Kainga kore
He ngoikore te whakautu a Naahinara ki te aawhina i te hunga kainga kore.
Hai taa Louisa Wall mema paaremata o Manurewa kei te tupu haere te raruraru kainga kore i tana rohe pooti me tana kii he ahuatanga pouri rawa te korenga o nga whare me te tokomaha ka peia i o ratou whare reeti.
Hai taa Wall e mahi tahi ana ia ki te roopu tautoko o te Salvation Army ki te rapu rongoaa mo te raruraru nui e korerohia nei.
Copyright © 2014, UMA Broadcasting Ltd: www.waateanews.com