September 24, 2014
NCEA he utu uaua ki etahi.
NCEA he utu uaua ki etahi.
Na te utu o te NCEA kua tono nga aakonga o Waikato me o ratou whaanau mo te puutea tautoko.
Kotahi mano whitu rau nga tono mo te puutea kua whakaaetia i tenei tau ki roto o Waikato neke atu i te 23 mano tono huri noa te motu i utua.
Kaati 76 taara ia tau te utu o te whakamaatautau NCEA mo te aakonga kotahi me te kii a nga roopu haapori he piikautanga taua utu ki nga whanau kore mahi.
Nga pakeke whaangahia te reo ki a ratou.
Ka huri te aro ki nga kaikorero pakeke ake i te wiki o te reo Maori a tera tau.
Hai taa Glenis Philip Barbara toihau o te Taura Whiri i te Reo Maori kua whakatauhia te kaupapa e kiia nei Whaangaihia te reo Maori ki nga maatua.
Ki a ia mehemea ka whakatupu i te reo o nga maatua ma reira ka whakarite tuuaapapa mo nga whakatupuranga kei te haramai.
Ka mutu ka whaangai mai i nga rerenga korero 50 ki nga wiki 50 hai tirohanga atu ma nga maatua.
Mohiotanga puutaiao.
Te hanga nei he puutea waa roa kua whakaritea hai whakatupu i nga kaupapa puutaiao me te whakataenga uaratanga o te Maori.
Koia te kitenga o Taamati Olsen te kaitohutohu Maori o te Tari Pakihi whai muri i te whakapaahotanga o nga hootaka 13 hou tata ki te 2 miriona taara te utu.
Hai taa Olsen ka whai hua te katoa pena whai waahi nga kairangahau puutaiao ki te maatauranga Maori.
Te arokore o nga tari.
Ko waiaro whakahaawea a iwi kei te rere tonu ki roto i nga tari kaawanatanga.
Koia te whakapae a Taariana Tuuria mo te hiahia o te Tari Whare me etahi atu ki te aarai i te anga whakamua o Maori Pasifika.
Ki a ia kaahore aua tari e whakapono ana ki te ahei o te Maori ki te whakarite huarahi, ki te kookiri i ana ake kaupapa.
Hai taana ano he ngoikore te mahi a nga tari kei nga rohe taiwhenua ki te hanga tuuranga mahi mo te Maori.
Uri o Hau whai hononga.
Ka tuuhura a Te Uri o Hau o Ngati Whaatua me te kuratini o UNITECH i nga painga o te ako ki runga marae.
Kua whakarite hononga te hapuu me te kura waananga raa ki te whakamahi i nga rawa tangata kia tutuki pai i nga wawata o nga taha e rua.
Hai taa Mikaira Miru kaiaarahi o Te Uri o Hau ma te hononga nei ka hoki ki o ratou marae ki te whakarite ano i aua waahi hai puutaketanga ako mo nga uri.
Tuurei: tirohia te taiao, tirohia o tatou tamariki.
He otinga pouri te koowhiringa pooti mo nga Kaakaariki.
Koia te korero a Meetiiria Tuurei rangatira takirua o te roopu raa heoi ano hai taana ka whakapau kaha tonu ratou ki te haapai ake i nga take whakaruruhau i te taiao te mea kee
me pehea e whakapakepake i a Naahinara ki te aronui ki era ahuatanga.
Ki a ia ano ko te oranga o o tatou tamariki te aawangawanga nui tonu.
Copyright © 2014, UMA Broadcasting Ltd: www.waateanews.com