September 24, 2014
He hiikoi whakahee.
He hiikoi whakahee.
E whakarite ana te hunga whakahee i te keri hinu ki Muriwhenua ki te hiikoi mai Te Rerenga Wairua ki Taamaki Makaurau.
Hai taa te kaiwhakahaere o te hiikoi a Mike Smith he hokinga mahara te tukuna o te raihana keri hinu i tenei waa ki te hiikoi mo te takutai moana i te tau 2004.
Ka tiimata te hiikoi i Te Rerenga Wairua a te Raahoroi ka mutu a te Tuurei i te hui o nga kamupene hinu ki Sky City.
Rena…ka mahue?
Kua tahuperatia e nga kaipupuri o te kaipuke Rena te utu me te roanga o te waa ki te tango atu taua paenga i te tokaraarangi o Otaaiti.
Te hanga nei he iti ake te utu tika mo tera mahi i te karanga a nga kaipupuri.
Ahatia nga korero e whakapae ana ka tuku tono ki te Kooti Taiao a tera marama kia waiho te Rena ki Otaaiti.
Reipa kei te whara tonu.
Kei te mitimiti a David Cuniliffe i ona taotuu toorangapuu aa tera tonu pea ka heke i tana tuuranga.
E titiro ana etahi o nga mema o Reipa ki taua tuuru engari kua whaaki mai a David Parker maangai take oohanga ko ia tetahi ka noho ki te taha.
He maha nga iingoa kei te korerotia kia tuu hai rangatira hou i tenei waa tonu ko te rerenga o te puehu noa iho e kitea ana.
Ruakura tauhokohoko kua whakaaetia.
Whai muri i te whakaaetanga mo tetahi waahi tauhokohoko ki Ruakura e poonitiniti ana te hunga whakahee ki tera mahere a Tainui.
I whakaaetia te tono a Tainui e te roopu Whakaruruhau Taiao ahakoa te aatete o etahi kainoho i nga takiwaa o Silverdale me Fairview Downs.
Heoi ano e kii ana a Mike Pohio o Tainui Group Holdings ka taea e te iwi te titiro whakamua, te mahi tahi hoki ki te kaunihera a nga marama e tuu mai nei.
3 ira 3 piriona taara te utu o te hootaka.
Ngamotu koromatua titiro whaanui.
Me mihi ake ki te kaunihera o Ngaamotu ka tika.
Koia te korero a Taariana Tuuria rangatira takirua o te Paati Maori me tana kii ka rongohia te reo o te Maori ki nga teepu kaunihera he mea nui tera.
Ko taa Te Ururoa Flavell pena tokoiti nga Maori kei tetahi rohe e tika ana kia whai reo motuhake.
Hai taa Flavell ano kei te tupu haere te maha o nga kaunihera e awhi mai ai i te Maori me ona ahuatanga.
Nga painga o te korero.
He rerekee te raupapa o nga whakahaere i te whakataetae Nga Manu Korero i tenei tau.
Hai taa Taatere McCleod o Ngati Kahungunu e hautuu ana i te kaupapa raa ki Ahuriri ko nga kauhau ohorere te mahi tuatahi hai taana ano kei te rongohia nga whakaaro hoohonu o te hunga rangatahi.
Ki a ia me whakahiihii i o tatou ngaakau ki te maaia o nga tamariki kura tuarua ki te tuu maarohirohi i te pourewa korero.
No reira ka karangahia nga toa o nga waahanga e whaa o te whakataetae nei apopo.
Copyright © 2014, UMA Broadcasting Ltd: www.waateanews.com