September 17, 2014
Niho pirau, whakatikahia.
Niho pirau, whakatikahia.
He tino aawangawanga ki nga iwi te hauora o o tatou niho.
Koia te whakatuupato a Te Ao Maarama te roopu Maori mo nga take niho me to ratou maangai a Taakuta Rudi Johnson.
Hai taana kei te huri etahi iwi ki te whakauru i nga hootaka niho ki a ratou kaupapa hauora na te mea kei te kitea nga paanga kikino o nga niho piirau.
Kei te tautoko hoki a Te Ao Maarama i te tikanga ki te whakaranu i te matuu fluoride ki o tatou ratonga wai.
Taitokerau, ko wai ka mohio ki te otinga pooti.
E whakapae ana ka tuu kaha te Taitokerau ki te pooti i tenei tau.
Koia te korero a kaimahi haapori a Ngaahau Davis me tana kii e mamae ana te iwi whaanui e whakamomori ana ratou kia whakarerekeehia te kaawangatanga.
Ka mutu e mea ana te nuinga o nga kaiwetewete toorangapuu kaore e taea te matapae ko wai ka toa i te rohe pooti o te Taitokerau.
Te haerenga ki Waikato
12 mano nga tuuranga mahi hou ka hangaia ki roto o Waikato.
Koia te kii tauranga a David Cuniliffe o Reipa i tana haerenga ki Kirikiriroa inanahi.
I reira te tokomaha o nga taangata ki te mihi atu ki a ia he pai rawa atu te whakautu a taua iwi ki nga korero a te rangatira o Reipa.
Ko taana ano ka whakahou i nga ratonga rorohiko ki nga kura o te rohe.
Nga Tikanga Penihana
Ka whakaheke a Naahinara i te rahi o nga taangata noho penihana ma te 25 paiheeneti mehemea ka hoki ano ratou hai kaawanatanga.
Koia te korero a Paula Bennett o te kaawanatanga me tana kupu ka whakakikii i nga whakaritenga mo te hunga penihana kia tika te ahua o te tautoko ki a ratou.
I te mutunga ake hai taa Bennett ano e arotahi ana a Naahinara ki te whakatupu tuuranga mahi, ki te whakakaha i te taha oohanga o Aotearoa,
ki te whakapiki i te utu puutea ki nga kaimahi.
Kei te kite i nga koohao.
E whaa nga whare o te tari WINZ kua katia whai muri i te koohurutanga o nga kaimahi e rua i Ashburton.
E mea ana te iwi kaainga kua mahue atu he koohao ki nga ratonga paapori o te rohe kaahore e mohio ana hai ahea ka tuuwhera ano aua whare.
Kei te kii te tari Whakatupu Kaupapa Paapori ko te katinga o nga whare tetahi waahanga o te arotake ohotata e whakahaerehia ana e te tari huri noa te motu.
He kaupapa whakapakaru roopu.
Ka rongo a Naahinara i nga paanga kikino o nga whakapae mo nga roopu puurahorua o Aotearoa.
Hai taa Winston Peters rangatira o Aotearoa Tuatahi ko te paatai nui i titiro poka noa aua roopu ki a tatou kaahore ranei?
Hai taa Peters ano kei te puta mai nga korero e whakaaturia ai te ahua ngaaueue o te hononga i waenga i a Aotearoa me Amerika.
Na reira ia e mea ana ka tika te wehi o te tokomaha o tatou kei takahi te mana tangata o tena, o tena o tatou.
Copyright © 2014, UMA Broadcasting Ltd: www.waateanews.com