August 06, 2014
Me whakatau i te puehu ki te uru.
Me whakatau i te puehu ki te uru.
Ka whakatuu roopu ma ratou e titiro atu ki nga raruraru i te uru o Taamaki.
Hai taa kaumaatua Sonny Niha o te Whaanau o Waipareirahe mea nui kia totoro atu ki nga whaanau o taua rohe.
SONNY NIHA: https://secure.zeald.com/uma/play_podcast?podlink=MjA4NDI=
He arotake hao ika
Akuanei ka tirohia me kore ranei nga whakatiki mo te hoko tohanga hao ika e paakinotia ai te hua puutea ki nga uri.
Hai taa Matiu Rei kaiwhakahaere matua o Ngati Toa Rangatira ka arotakengia te kaupapa whaanui
MATIU REI: https://secure.zeald.com/uma/play_podcast?podlink=MjA4NDU=
Whanganui ngaakau rorotu
E harikoa ana nga iwi o Whanganui ki te otinga o taa ratou tono tuku iho…otiraa ko taa ratou whakataunga Tiriti o Waitangi.
Tata ki te kotahi mano taangata i hui ai ki te marae o Raanana inanahi kia tirohia te hainatanga o te kirimana e whakamana ai to ratou paanga ki te awa i raro i te ture.
Hai taa maangai korero a Gerrard Albert kua memeha te mana o nga iwi ki te whakahaere i to ratou awa, na te karauna i whakarite ai heoi ano kua huri te tai me te mea nei no nga iwi te tikanga, he tuuaapapa to ratou mo te whakaritenga o nga tono whenua kei te haramai.
E titiro whakamua ana a Tainui
Kua whakaaetia mo tenei waa te tono a Tainui ki te whakarite whenua i Ruakura mo tetahi waahi tauhokohoko.
E matapae ana ka whakatuuturu i taua tono a tera marama.
A nga tau 50 e tuu mai nei ko te piirangi o Tainui kia whakatupu i taa ratou hootaka hokohoko ka nui te tini o nga tuuranga mahi e waihangatia ai.
Hai taa Mike Pohio te toihau o Tainui Group Holdings ka whakatuu haapori ki Ruakura me te hanumitanga o nga kaupapa maha i reira.
He marautanga ako, he kaupapa whai hua.
E tika ana me whakamanawa i nga kura ki te puutaiao.
Kua whakarewa a Hekia Parata Minita Take Maatauranga i tana hootaka i tera wiki ki te whakahauhau i te paanga ki te puutaiao me nga take o te haangarau huri noa te motu.
He whenua hihiri i te mahara koia te iingoa o te rautaki me te hiahia hoki ki te whakarite i te paanga o nga kaiako me nga tauira ako ki nga kaipuutaiao me nga kamupene puutaiao i raro i te marara o te puunaha maatauranga.
He aituaa
He aituaa, he aituaa kua hinga a Dave Hereora kaitoorangapuu o mua i te roopu Reipa, whai muri te maauiui poto.
I uru atu a Hereora ki roto o paaremata i te tau 2002 ka piki hai tiamana o te Komiti Whiriwhiri Kaupapa Maori.
I mua atu i tana taenga ki Poneke, he kaimahi ia mo nga uniana whakaruruhau kaimahi.
Kua kawea a Dave Hereora ki te marae o Hairini i Tauranga ka tanumia ki te rua kooiwi o ona maatua tuupuna a te Paraire.
No reira e te rangatira, kei kona koe i to kaainga puumau e takoto tiiraha na, takoto mai, moe mai raa.
Copyright © 2014, UMA Broadcasting Ltd