Listen Now: 
He hoatutanga puutea.
Ka whiwhi puutea nga marae o Waikato Tainui 15 miriona taara ka hoatu.
Hai taa Raahui Papa tiamana o te Ara Taura ko te whakatupu i nga marae tetahi mea nui ki te iwi whaanui.
Hai taana ano he momo whakangao taua puutea hai whakatenatena i te tupu o te iwi, o nga hapuu, o nga marae kia tuu motuhake ai ratou i to ratou ake mana.
Ka tautoko hoki i nga marae me te aha ma ratou ano nga hootaka whai hua e whakahaere hai painga mo ratou.
Kahungunu whakatupu rangatahi.
Ka uu tonu a Ngati Kahungunu ki te whakaako i nga puukenga whakatere waka ki nga rangatahi.
Hai taa Piripi Smith tiamana o te roopu e kiia nei ko Te Matau aa Maaui Voyaging Trust kua tukua e Ngati Kahungunu ki a ratou te mana whakahaere o to ratou waka ma reira ka whakaniko
i nga mahinga tuuruhi, i nga mahinga pakihi hoki hai taapiritanga ki nga hootaka mo te hunga taiohi.
Kaikoura tiaki taiao.
Kua whakaae a paaremata ki te raahui i te moana o Kaikoura.
Kua whakarite nga rohe o te moana ki te whakaruruhau i nga tamariki a Tangaroa ko te tohoraa tera, ko te kekeno tera tatuu atu ki etahi waahi motuhake ki te iwi o reira otiraa ki te Tai o Marokura.
Ka mutu ka whakatiki hoki i nga mahinga hii ika.
He wiki ano, he aawha ano.
He aawha te matapae huarere mo nga rangi whakataa ki etahi rohe o te motu.
Kua tukua e te tari huarere taa ratou whakatuupato ki a Poneke ki a Waitaha ki a Murihiku ki te Taipoutini.
A te po nei ka tatuu te ua makerewhatu ki Taranaki engari e kore te taha raki o te Ika aa Maaui e paakinotia.
Ahatia nga korero mo te aawhaa he rerekee te korero inanahi i Otautahi 22 te paa mahana i reira.
Inumia keetia ko te wai.
Waiho mo muri atu i te koowhiringa pooti ki te inu waipiro.
Koia te huarahi kei te whaaia e etahi o nga rangatira toorangapuu.
Kua whaaki mai a John Key ko ia tetahi kei runga i te waakena pera ano a David Cuniliffe o Reipa raaua ko Russell Norman o nga Kaakaariki.
Hai taa Cuniliffe he tino kai te wai koia ko te inu moona a nga wiki e tuu mai nei.
Ki te kore he kaipuke ka pehea?
Ma tetahi pire paaremata kua whakaaetia ka whakamatemate pea i etahi pakihi hii ika.
Koia te tirohanga a Te Ururoa Flavell rangatira o te Paati Maori mo taua pire ka aukatingia te taenga mai o nga kaipuke hii ika o taawaahi.
Kiihai nga iinoi a etahi iwi i aronuitia araa me aata whakariterite i nga tikanga whakatiki me te mohio ko te oranga o nga kaimahi te mea nui.
Hai taa Flavell ano e kore e taea e etahi iwi nga utu hou e taka mai ai te ngote waihoki he koopaka o te kaipuke te raruraru nui ka kitea.
Copyright © 2014, UMA Broadcasting Ltd
RELATED NEWS
