February 12, 2014
Kaua e mahue a koutou paenga i Otaaiti.
Kaua e mahue a koutou paenga i Otaaiti.
E riri ana nga hapuu me nga iwi o Tauranga Moana ki te hiahia o nga kaipupuri kaipuke Rena ki te mahue i nga toenga o te paenga o taua waka ki runga i te paetoka o Otaaiti.
Na runga i tera e piirangi ana nga raawaho ki te whakahou i etahi ahuatanga ki runga i te moutere o Mootiitii engari e kii ana a Buddy Mikaere tetahi o nga maangai korero mo tenei kaupapa ka wero ia i te hiahia o nga kaipupuri o te Rena kia haapai ake te hanga haumaru o te moana.
Cuniliffe…haukotingia te pooharatanga.
Ma te hootaka a Reipa e kiia nei ko Best Start ka whai rongoaa ki nga raruraru pooharatanga o te waa.
Koia te kii taurangi a David Cuniliffe rangatira o taua roopu me tana kii e piki haere ana nga raruraru mo te taha poohara e korerohia nei ki nga whaanau huri noa.
Hai taa Cuniliffe ano he tohu kino te pooharatanga kaahore e pai ana kia maatakitaki noa na reira ki a ia e tika ana me mutu te matapiko.
Nga tohu reo irirangi.
Kua huakina te kuaha ki nga tono mo nga tohu reo irirangi ka tuu ia rua tau.
Hai taa kaiwhakahaere Erana Reedy o te Reo Irirangi o Ngati Porou a tera marama ki Rotorua ka whakanui i nga mahi a nga teihana ki o ratou ake haapori.
Hai taana ano ka tuu taua po i tenei tau hai whakamaharatanga ki a Parekura Horomia Minita Take Maori o mua me tona kaha i ona raa ki te haapai ake i nga kaupapa o te reo rangatira.
Ngati Kuri tuu tonu.
Kua whaaki te Karauna i ona hara ki a Ngati Kurii o Muriwhenua ko taa te Minita Take Tiriti o Waitangi a Chris Findlayson he whakapaaha.
Hai taa Findlayson e hia kee tikanga kaahore i whaaia e te Karauna i to ratou hononga ki te iwi raa.
Ko nga kaainga Maori pera i Te Haapua i paakinotia e te ngoikore o te Karauna ki te tiaki i a ratou ki te whakarato i nga ahuatanga hauora.
Hai taa te Karauna i raro i te whakataunga kua hainatia e nga taha e rua ka whakahou i to ratou piringa ki a Ngati Kurii i runga i te tika me te pono koia te kii taurangi.
Plunket, e tautoko ana i nga pouaka momore.
Kua huri nga roopu haapori ki te tautoko i te hiahia ki te whakakore i nga ahua katoa kia momore nga pouaka hikareti.
Hai taa te roopu poipoi tamariki o Plunket 60 paiheeneti o nga tamariki katoa i Aotearoa e noho ana i tetahi kaainga auahi kai paipa na reira ka kite aua tamariki i nga ahua kikino ki nga pouaka paipa i o ratou kaainga ia raa, ia raa.
Kaati kei te kii a Plunket he mea nui kia whakaruruhau i nga whakatupuranga hou kia kore nga paanga kikino o te tuupeka e whakararuraru i a ratou.
Me mutu inaianei.
Kua tae ki te waa kia mutu te kai paipa koia te akiaki a te tokomaha, a Taariana Tuuria, a wai atu ranei.
E mea ana te korero ka hau mai nga roopu nunui o Amerika ki te whakaweti i te kaawanatanga o Aotearoa kei haukotingia etahi tauhokohoko mehemea ka huri a Aotearoa ki te tautoko i nga pouaka momore mo te tuupeka.
Te mea kee kaahore nga kaipakihi o Amerika e piirangi ana ki te korero mo te rima mano taangata o Aotearoa ka mate ia tau na runga i nga paanga kikino o te momi hikareti.
Penei me te rino te hanga o te tinana.
Kua kitea te ahuatanga whakamiiharo e tupu ai huri katoa Aotearoa ko Iron Maori tera.
Kotahi rau nga kaiwhakataetae i uru atu ki tera taumaahekeheke i Whakatuu i nga raa whakataa ko te mahi he eke pahikara, he kauhoe, he oma i a ratou e whakataetae ana.
Hai taa kaiwhakahaere Heather Te Au Skipworth kua kite te tupu matomato o te Iron Maori me te kii he huarahi tera hai whakatika i etahi raruraru tinana, raruraru hauora.
Copyright © 2014, UMA Broadcasting Ltd