February 05, 2014
Willie and JT, horekau he hara i kitea.
Willie and JT, horekau he hara i kitea.
Kaahore i whati nga tikanga paapaaho te whakawhitinga korero a Willie Jackson raaua ko John Tamihere mo te roopu Roast Busters horekau ranei he amuamu ookawa i taka mai ki nga kaiwhakahaere kaupapa paapaaho.
Ki nga kitenga i te puurongo a te roopu Whakahaere Kaupapa Paapaaho i whakaritea nga korero i runga i te tika me te pono kaahore tetahi tangata i tuukinotia.
Maanu Paul, rautaki reo.
Kei te hee te huarahi e whaaia nei e Pita Sharples ki te whakarauora i to tatou reo rangatira.
Koia te whakapae a Maanu Paul rangatira takirua o te Kaunihera Maori.
Ka korero a Sharples ki te kaahui o nga rangatira a iwi i Waitangi i te raa nei mo te nui ake o nga mahi whakaora reo hai hoatutanga ki nga iwi.
Heoi ano hai taa Paul ka tuu nga roopu whakahaere reo pera i te Maangai Paahona te mahi a te Kaunihera Maori me nga kaitono reo Maori, paapaaho ranei kiihai aua roopu i whakaarahia e nga iwi.
Jones, he korero mo Waitangi.
Ko te whakamaharatanga mo te raa o Waitangi kei te tupu i te waa e whakaarohia ana te nuinga he aha te tuuranga o tena o tena o tatou i tenei whenua o Aotearoa.
Koia te tirohanga taumauri a Shane Jones o Reipa ki taua rangi motuhake me tana kii he ngaakau whakapuke tona ki te hiahia o nga kaunihera me nga roopu huri noa e whakarite ana he arotahi hou mo ratou.
Hai taa Jones ano ehara te Tiriti i te korero mo nga motika pupuri whenua anake.
Matepukupuku, ka kitea whaanuitia.
Ka huunuku nga maauiui kino pera i te matepukupuku atu i nga whenua whai rawa ki te whakararuraru i nga whenua poohara a nga tau 20 e tuu mai nei.
E mea ana nga kaipuutaiao o te Roopu Hauora o te Ao ka tahitahia nga waahi maha ki te matepukupuku.
Hai taa ratou ano he tino aarai te piki haere o tera mate ki te tupu o te tangata me tana hauora.
Ruanui kei te whakahee ki nga mahi kerikeri.
Tera tonu pea ka aatete a Ngati Ruanui o Taranaki ki te tonga i te tono a kamupene Trans-Tasman Resources ki te keri i te kirikiri rino ki to ratou aakau.
E kii ana a toihau Debbie Packer-Ngaarewa he mahi whati tata, he mahi moorearea ki te taiao koia te whakatuupato o te waa.
Hai taana ano horekau he korero tauwhaaiti mo nga hua e taka mai ai ki te rohe o Taranaki ka korero kee te Kaawanatanga mo nga hua ki te motu.
Mate kirikaa, he aha ona paanga moata?
He pehea te kaha o nga whare hauora i nga kura ki te aarai i te mate kirikaa araa rheumatic fever?
Koia te paatai a nga kairangahau o te Whare Waananga o Taamaki Makaurau me te kii ka titiro hoki ratou ki te pai o nga mahi a nga poari hauora a rohe aa ka ine i te tokomaha o nga tamariki mate korokoro i runga i te mohio he paanga moata te korokoro mamae o te mate kirikaa.
Asia Maori, ko nga hua ka kitea.
He mea tino nui nga hononga o te Maori ki nga whenua o Aahia i te huringa o Aotearoa hai hoa tauhokohoko mo ratou.
Koia tetahi whaainga i te hootaka Waitangi rua rau tau e titiro whakamua ana ki te tuuranga o Aotearoa i te tau 2040.
Kaati e meingatia ana kaahore nga roopu Maori e tatari ana engari ka tere paa atu te ringa ki nga whenua, ki nga iwi o taawaahi kia mahi tahi ai, kia hokohoko rawa.
Kura Hourua, ka tokohia e etahi atu?
Ki nga korero o te waa e piirangi ana etahi kura hourua ki te tuku atu i etahi o o ratou tauira ki kura kee ki te ako i nga kaupapa tauwhaaiti.
Kei te kaha whakahee te Uniana Maatauranga ki era momo whakaritenga me te kii kaahore nga mema e pai ana ki nga tikanga e toko ai nga kura.
Heoi ano kua kitea nga puka whakaae ai ki te tukuna o nga mahi whakaako atu i tetahi kura ki tetahi atu.
Ka huri haere nga tikanga a te tari whare.
Neke atu i te 68 mano nga whare o te tari whare e tuku atu nei ki nga whaanau poohara huri noa Aotearoa 34 paiheeneti o ratou he Maori.
Hai te marama o Paengawhaawhaa ka piki ake te hoongoingoi o nga arotake otiraa, o nga kirimana whakarite noho whare koni atu i tera ka kaha ake te tirohanga
atu ki nga hiahia noho whare o nga kainoho katoa a muri atu nei kaati ka mahue te whakaaro kia noho mo ake tonu atu i tetahi whare a te tari.
Copyright © 2014, UMA Broadcasting Ltd