Listen Now: 
He puutea tautoko
Ka ahei nga roopu Maori e whai ana i te hootaka whakatuu whare a te Kaawanatanga ki runga whenua tupuna ki te tono atu kia whiwhi puutea aawhina ki te whakarite i nga ratonga pera i te hiko, i te wai.
Hai taa Taariana Tuuria Minita Tuarua mo nga Take Whare horekau he puutea a etahi roopu Maori ki te tautoko i nga whakaaro katoa e paa ana ki te whakatuunga o nga whare.
Atu i tera ma te puutea kua whakaritea nei ka maamaa te huarahi ki nga whaanau ki te kuhu atu ki o ratou whare.
Kua hoki mai te Minita Maori.
Kua hoki mai a Pita Sharples Minita Take Maori i Awherika ki te Tonga aa i whai waahi ia ki te poroporoaki i a Nelson Mandela i tona tangihanga.
Ko Sharples tetahi o nga rangatira o te ao i tatuu ai ki reira ki Pretoria te taone i whakawahia a Mandela te kirimangu tuatahi kia tuu hai Peretini o tera whenua.
Hai taa Sharples i reira nga puu nunui o te ao, te iti me te rahi.
He ratonga hou mo te reo.
Kua whakaurua te reo Maori ki te ratonga whakamaori korero a te roopu nui o Google.
Hai taa Ross Young kaiwhakahaere kaupapa a Google i Aotearoa kua mahi tahi tana kamupene me te Whare Waananga o Waikato ki te kohikohi i te hia kee mano kupu me nga rerenga korero e piirangitia ana mo taa ratou ratonga.
Hai taana ano ma te hootaka e kiia nei ko Google Translate ka whakarite i nga maha atu o nga momo whakaaturanga kia kitea ai te reo, kia korerohia hai taputapu whakatupu maaramatanga ki te hunga kaahore e tino mohio ana ki te reo Maori.
Ka aroha ki nga Nepata
Kua whakakaahore te Kaahui Matua o te Kaawanatanga i te tono a te Komiti Whiriwhiri Maori kia utua a George raaua ko Damien Nepata mo o raaua whara kino i a raaua e mahi hoia ana i te ope a Tumatauenga.
I koopaahia te tinana o George i weraina kinotia to Damien. Hai taa Minita Take Wawao a Jonathan Coleman i whiwhi kee te tokorua raa i nga hua puutea a ACC me te Tari Wawao mehemea ka hoatu ki a raaua he taapiritanga puutea ka whakaritea he tikanga ano hai whai.
Hai taa Tau Henare tiamana o te komiti whiriwhiri, he whakatau tera kei te rakuraku i tana ngaakau.
He tika te whakatau
E tautoko ana a Shane Jones o Reipa i te whakatau kia waiho te Kaunihera Maori ki taana e whakarite ai.
Kua karangahia e Pita Sharples Minita Take Maori e kore e whakarerekeehia te ture e paa ana ki te Kaunihera raa engari e whakaarohia ana me kore e whakarerekee nga tikanga whakahaere i nga Waatene Maori.
Hai taa Jones ano he orite te Kaunihera Maori ki nga roopu katoa araa ka taea te whakahaangai i a ratou tikanga whakahaere kia tuutaki i nga wero o apopo kei mua i a tatou te Maori.
Ka whakapootaetia nga tauira o Raukawa
Ka tuu te raa whakapootae i nga tauira o Te Whare Waananga o Raukawa apopo ki Otaki.
Hai taa te amokapua o taua kura waananga a Robin Hapi kua whakarite paerewa taua kura mo te whakawhitinga o te maatauranga Maori.
E mea ana a Hapi ka tautoko nga tauira whiwhi tohu i te piripono o te Whare Waananga ki te aru i nga kaupapa Maori, i nga tikanga Maori aa kei te piki haere te ahua o te mahi, o nga otinga akome te tokomaha o nga aakonga e tatuu ai ki taumata tiketike.
Copyright © 2013, UMA Broadcasting Ltd
RELATED NEWS
