Listen Now: 
Ara tuuaatea kaua e hoko atu.
Whakareerea te mahere kia hoko atu te ara tuuaatea 4G apopo.
Koia te karanga a te Kaahui Ara Tuuaatea o te Maori ki te Kaawanatanga me te kii e tika ana me homai ki te Maori nga iarere e rua kei te toe.
Hai taa Huirangi Waikerepuru maangai korero o Kaahui Maori kua huri te Karauna i tana tuaraa ki te Tiriti o Waitangi me tana hoa tiriti mo tenei kaupapa ahakoa nga kitenga o Taraipiunara o Waitangi e tautoko ana i te tono a te Maori.
Ko wai e piki tuuranga?
Tokoono nga taangata e piirangi ana ki te piki tuuranga mo Taariana Tuuria hai kaiwhakataetae mo te tuuru Maori o te Te Tai Hauaauru a tera tau i te Koowhiri Pooti.
Ka heke a Tuuria aa ka nui te tini o nga mema o te Roopu Torangapu Maori tae atu ki te marae o Whangaehu i nga raa whakataa ki te whakarongo ki nga kaitono e ono.
Hai taa Ken Mair te Peretini tuarua o te Paati Maori kaahore ratou e rapu tangata ki te whakakii i nga huu o Taariana kei te rapu tangata maana ano tana huarahi hou e whakairo.
He whakatuma
E whakatuma ana nga Maori o Whaaingaroa ka whiu atu he paanui hara ki a kamupene hinu ki a Anadarko.
Hai taa Angeline Greensill te maangai taiao o Tainui e whakaarohia ana me hari te kaupapa nei ki te Kooti.
Hai taa Greensill ano kei roto te kaipuke o Anadarko i te taunga hii ika otiraa o te Taihauaauru.
Tera pea ka hau atu te iwi ki te au o te moana ki te whakahee i te urunga poka noa o Anadarko ki te rohe moana o te iwi.
He poowhiri tuatahi
Ka piripono te koromatua hou o Rotorua me tana Kaunihera ki nga Maori o tana rohe.
Kua poowhiritia okawatia a Steve Chadwick me ana kaikaunihera i Ohinemutu.
He tuatahitanga tera kia aata poowhiri a Te Arawa i tetahi Kaunihera hou.
Hai taa Chadwick ko te Maori te kaikookiri take oohanga o apopo aa kua tae ki te waa ki te whakahou i nga hononga.
Te Ahurea Maori
Ko te tirohanga pakihi he whakaaturanga tika hoki tera o to tatou Maoritanga.
Koia te korero a Karl Johnstone kaiwhakahaere o te Puia i Rotorua te Whare Toi Maori o Aotearoa.
E whakanui ana a Te Puia i to ratou huritau 50 tau me te whakakotahitanga o nga pakihi tuuruhi Maori ki nga kura raranga, ki nga kura whakairo i whakarewaina iwa tekau tau ki muri.
Hai taa Johnstone ano te mea nui kia pupuri te ahurea me te tuakiri Maori, kia whakaruruhau nga taonga tuku iho
Wero rewharewha
Kei te piki haere te maha o nga taangata e werohia ai mo te rewharewha i tenei tau.
Tekau mano taangata te rahi o te tupu i te tau kua ngaro nei te hanga nei kua maarama ki te tokomaha he maauiui kino te rewharewha e patu ana i te hauora o te tangata ka whakatuma i te oranga o te tinana.
Copyright © 2013, UMA Broadcasting Ltd
RELATED NEWS
