Listen Now: 
Kia tuupato kei ngaro nga painga
Na te nui o te nama kei runga i nga pokowhiwhi o nga pakihi ahuwhenua, he tuuwhera te noho, mehemea ki te heke maarika te utu o te miraka i taawaahi.
Koia te whakatuupato a te Whare Whakahaere Puutea ki nga paamu kuuteetee kau huri noa.
E tupu haere ana te rahi o nga roopu me nga iwi Maori e uruuru atu ai ki aua momo mahi.
Heoi ano e kii ana nga kaiwetewete ahuwhenua, kia iti te puutea e tonoa nei, kia iti te nama.
Me ako ka tika
Kua tuu ake etahi ratonga ropiropi tamariki me taa ratou kii. E tika ana kia akiaki te kuhuna o nga koohungahunga i te tonga o Taamaki ki nga kura mo nga tamariki nohinohi.
Ko nga tamariki Maori, ko nga tamariki Pasifika kei te korerohia i runga i te mohio. Ka nui te tini o nga koohungahunga e noho ana i te kaainga, kaahore e haere ana ki tetahi kura.
Te wawata o te Kaawanatanga kia 98 paiheeneti te rahi o te hunga ririki e kuhu atu ai ki te kura koohungahunga, hai a mua i te tau 2016.
He toki taakaro
He hautupua, he autaia a Pita Fatialofaa i te ao whutupooro e kore ano tana momo e tino kitea.
Koia te korero a Bill Bush kaitaakaro Maori o mua o te kapa oopango mo Fatialofa e tanumia ana i te raa nei ki Manukau.
Hai taa Bush ano, no te waa i a Fatialofa, he tokoiti ake nga kaitaakaro o te Moana Nui a Kiwa.
I tuu ki te taumata tiketike o tera taakaro kaati he rangatira, he matai ia mo tona iwi.
Whaangaihia nga tamariki
E tatuu ana te pire whaangai tamariki a Hone Harawira ki tana paanuitanga tuatahi i te raa nei ki ro Paaremata.
E tautokohia ana taua kaupapa e nga roopu haapori aa kei te whakahauhau ratou i nga mema Paaremata
Ki te kookiri i te pire nei kia aata titiro ki nga honohononga i waenga i te parakuihi me te ahei o te tamaiti ki te ako i te kura.
Ahatia, hai taa Dover Samuels mema Maori o mua, ma nga maatua o ratou tamariki e whaangai, kaua e waiho ma tetahi atu.
He kupu whakatuupato
Ko te huringa o te aahuarangi me te ahua o te taiao, e kore nei e taea te karo.
Koia te korero a te roopu Kaakaariki i roto o Paaremata whai muri te huripari nui i te whenua o te Phillipines.
Hai taa rangatira takirua a Russell Norman, kei te kite i nga paanga kikino o nga mahi whakaparuparu a te tangata, i nga kokonga katoa o te ao aa, ki te kore tatou e whakarerekeehia a tatou tikanga.
E kore kaahore ka patua nga whakatupuranga kei te haramai.
Copyright © 2013, UMA Broadcasting Ltd
RELATED NEWS
