Listen Now: 
Kua whakahoonoretia a kaipakihi Kiingi Smiler mo aana mahi nunui i te ao ahuwhenua.
I tuku tohu ki a ia i te hui a tau a te Kaahui o nga Roopu Maori i Heretaunga i nga raa whakataa nei.
E mea ana te korero ko Smiler tetahi i aata waihangatia te kamupene o Miraka aa naana hoki i whakaara ake nga hui mo te Kapu Ahuwhenua, hai whakanui i nga mahinga ahuwhenua a te Maori.
He korero pai taa Reipa
Ka aronui ki nga wawata o te Maori a muri atu nei.
Koia te kii taurangi a David Cuniliffe rangatira hou o Reipa i te waa nei e titiro whakamua ana ki te koowhirnga pooti a tera tau.
I to ratou hui i nga rangi whakataa kua whakatuuria ko Nanaia Mahuta hai tiamana tuarua Maori hou.
Kua tukua hoki te mana ki te Kaunihera Maori o Reipa kia whakaraarangi ai nga kaitono Maori i runga i te tika hai a mua i te hoatutanga o aua iingoa ki te Komiti Raarangi.
Hai taa Cuniliffe e kore ia e whakarongo ki nga kakii whero.
Ka titiro whakamua
Te hanga nei e kaha ake ana nga rangatahi o Ngai Tahu ki te whakarite huarahi mo ratou ina tae atu ki to ratou kaumaatua, taikuiatanga ranei.
E kii ana nga kairangahau oohanga tera tonu pea ka penapena puutea nga taiohi o tera iwi mo te oranga ki te waa pakeke te kaupapa.
Kaati e mea ana te Paakeha me mihi ake ki a Ngai Tahu me te whakaaro nui o te penapena puutea.
He karanga ohorere, he karanga pai.
Kua whakaritea ko tetahi o nga mema Maori hou o te Kaunihera a rohe o Waikato hai tiamana tuarua mo ratou.
Ko Tipa Mahuta tera he tuakana ki a Nanaia mema paaremata o te roopu Reipa.
E kii ana a Tipa Mahuta e rikarika ana ia ki te kookiri i nga wawata o ona iwi, ki te whakawhaanui hoki
i nga hononga whakahaere ngaatahi me te Kaunihera.
Kua ngaro i te tirohanga kanohi te kurii Maori.
I hea te kurii Maori e ngaro ana?
Koia te paatai a nga kairangahau o te Whare Waananga o Otaakou.
Hai taa Taakuta Cilla Wehi ko te kurii anake te kararehe rata i haria mai e nga tuupuna ki Aotearoa.
Hai taana ano kei roto i nga whakataukii tawhito nga korero mo te kurii engari kaahore ia e mohio ana te take i ngaro ai tera kiirehe whakahirahira.
Kua whai hua nga Maori i Kaanata.
Kua kaha rawa atu nga Maori mo te kapa whutupooro o Kaanata i tenei ata 40 ki te 15 te tatauranga i te taone o Toronto.
E ono nga piro a to tatou roopu e rua ki a haawhepeeke Jamison Gibson Park.
Copyright © 2013, UMA Broadcasting Ltd
RELATED NEWS
