Listen Now: 
Maaori, Mana ka korero.
Hei te wiki nei, hui tahi ai ngaa roopu toorangapuu maaori o Mana me te Paati Maaori.
Erangi teera ia te whakapono a etahi, e kore rawa eenei roopu e rua e noho piri.
Ko te tino putake o te hui, he whiriwhiri i ngaa kaupapa nunui, e taaea ai e raaua tahi te whakaae, erangi hei taa etahi o ngaa kaimaatirotiro i ngaa take toorangapuu, ko te hononga o te paati maaori me Naahinara tetahi taiapa e tauwehe ana i eenei roopu e rua.
Reipa paanga ki a takataapui.
He orite ngaa taangata katoa i raro i te ture, naa reira, me pehea raa te roopu Reipa e kookiri ai ngaa take nui a te hunga takataapui, kia whakakanohi ai hoki i teenei hunga.
Koinei tetahi o ngaa tino take kei mua i te aroaro o te roopu Reipa hei te wiki nei, i taa raatou hui aa tau.
E mea ana te roopuu, me whakatahuri i a raatou ture, kia tokomaha ake ai ngaa takataapui i roo Paaremata.
Ko te ture mohoa o te roopu e mea ana, ka taaea e wai ake raanei ngaa tuuru raarangi o Reipa te whakakii, erangi hei taa etahi o te roopu, me titaha atu raatou ki te hunga takataapui.
Keri matuu he aha ona painga?
Kua hanga rauemi hai aawhina i nga iwi kia whiriwhiri ai me kore ratou e whai waahi ki nga mahi keri matuu i te whenua, i te moana ranei.
I te raa nei ka whakarewa te Whare Waananga o Otaakou i tetahi pukapuka hou e tirohia ana nga kaupapa me nga wero o te keri matuu me nga paanga o tera mahi ki nga haapori Maori otiraa ki nga iwi.
E ai ki nga korero horekau he whakautu kotahi, he tirohanga kotahi me pehea te Maori e whakautu ai te hiahia ki te keri matuu.
Ko taa te Maori i mua he huarahi mahi moni tera engari kia tuupato ki te taiao.
Mate roro ka paakinotia te tangata.
Kua puta te karanga aa ngaa maatanga mate roro, kia piki ake ngaa mahi aawhina i ngaa mauhere.
E ai ki tetahi purongo a te tari hauora, koo atu i te iwa tekau oorau o ngaa mauhere maaori, kua paangia tetahi aituaa roro.
Hei taa tetahi taakuta mate roro a Richard Seemann, e ai ki tana titiro he tino hononga te mate roro ki te hunga mauhere Maaori.
Naa reira e ai ki te ao hauora, ki te kore taatou e aata manaaki i teera hunga ka uru tonu atu raatou ki te whare herehere
Porirua he rohe maataawaka.
Ka nui te hiahia o te koromatua tuarua hou o Porirua kia whakapaa atu nga iwi katoa ki a ratou.
E aata titiro ana a Ana Coffey ki te Maori me nga iwi Pasifika o tana rohe.
E mea ana ia he taone a Porirua kii pai i te rangatahi, kii pai i te kiri parauri.
Ki a ia ano e piirangi ana ia ki te rongo i nga reo o te hunga kaahore e kaha nei ki te korero i o ratou whakaaro.
Kei hea te ahuatanga Maori?
Kia kaha ake a Poneke ki te whakaata i te ahua o te Maori ki ona whare, ki ona huarahi, ki tona taiao.
Kua tatuu te koromatua a Celia Wade Brown ki te taima tuarua hai rangatira o te taone me tana kii ko te wairua motuhake o te tangata whenua te ahuatanga kai te rapua e ia.
Koni atu i tera ka whakahauhau ia i te tupu o nga papakaainga Maori araa ko nga kaainga me nga haapori pai te utu.
Copyright © 2013, UMA Broadcasting Ltd
RELATED NEWS
