Listen Now: 
He whakamaharatanga ki te mahi kino.
Ka tuu tetahi hui a te po nei ki Taamaki Makaurau ki te whakamaumahara i te kuhuna poka noa o nga Piriihimana ki Ruatoki ono tau ki muri.
E whaa nga taangata i hopukia mo te mau puu te take.
Hai taa Maarama Davidson o nga Kaakaariki i maaro te karauna i ona uaua i te tau 2007 ki te whakapeehi i te tangata whenua.
Ki a ia kei te kookiri whakamua a Ngai Tuuhoe me a ratou kaupapa whakatupu i te waa tonu e whakakaha ana te kaawanatanga i aana taputapu puurahorua.
Kohanga Kaupapa
Kua tohungia nga minita kaawana ki te tirotiro i te utu puutea me nga tikanga i whaaia e te kohanga reo.
I hui tahi a Heekia Parata raaua ko Pita Sharples ki te poari whakahaere o te Kohanga Reo i runga i nga whakapae e haangai ana ki nga kaari hua puutea.
E mea ana te poari ma ratou nga tohutohu katoa e whai.
Kaati hai taa Nanaia Mahuta ki a Parata na runga i te kino o te whakapae e tika ana me whakaatu mai te kohanga reo i nga korero e aamiomio nei mo te whakapau puutea.
Whanganui waipuke
Kua pahuu nga tahataha o te awa o Whanganui aa kei te waipuketia etahi waahanga o te taone.
Ko etahi huarahi kei te katia me te karanga a te tari ohotata he waa moorearea i to ratou rohe.
Kotahi rau ono tekau taangata kua whakatahia keetia i o ratou whare na te ua taataa inanahi.
Kua pari te tai i te iwa karaka me te whakapae he nui te pakarutanga ka tau ki tera o nga takiwaa.
Toi moko ka whakahokia
Kua haere nga kaiwhakahaere o Te Papa Tongarewa ki Ingarangi ki te tiki i tetahi kohinga toi moko.
E mea ana te Whare Waananga o Birmingham to ratou hiahia kia whakahoki aua toenga tuupuna ki o ratou kaainga tika.
Ko taa ratou he rangahau kia mohio ai no hea nga kooiwi aa ka tuu tetahi hui motuhake a te Paraire mo te whakawhitinga o nga tuupuna ki a Te Papa.
Huarere kino
He nui te utu a puutea o nga aawha huri noa Aotearoa i tenei tau.
E mea ana te kaunihera inehua neke atu i te kotahi rau miriona taara kua whakapaua ki te whakatikatika i nga whare me nga huarahi paakarukaru.
Ko taa ratou ano ka piki kino te utu ki te taupoki i te pakarutanga ahakoa ki hea ki te kore a Aotearoa e aro ki nga tohu aahuarangi o te waa.
No reira ko te paatai tonu me pehea e whakamaamaa i nga paanga kikino o nga huringa taiao.
Copyright © 2013, UMA Broadcasting Ltd
RELATED NEWS
