Listen Now: 
Ko Te Kohanga Reo
He mea kimi utu, te purongo i whakapaahotia e Whakaata Maaori, mo ngaa raruraru putea o te ringa pakihi o te tarahiti o te Kohanga Reo.
Koia te kii mai aa te maangai mo te Kohanga Reo a Toni Waho.
I ngaa marama ki muri nei, i tapahia te tuuranga mahi aa Titoki Black o Ngaai Tuuhoe, hei taa te Kohanga Reo i tapahia tana tuuranga mahi i te mea i te hee ai a te ara kimi maatauranga aa ngaa Kohanga Reo o Te Moana aa Toi.
Hei taa Waho, i te aahua nei, koira te take i whakapaahotia e Whakaata Maaori tana purongo i runga i te hotaka o Native Affairs.
Ko Te Hononga O Te Paati Maaori Me Te Roopuu Mana
Kei te kakii maaroo aa Te Ururoa Flavell, e kore rawa ia e hiahia ana, kia taaraia ai ngaa waka o te RTM me te roopu mana hei waka hourua.
Koira te whakatau aa te upoko o te roopu Mana a Hone Harawira.
E ai ki ngaa tatauranga o te waa, ko te nuinga o te ao maaori e tohua ana me hono tahi ngaa roopu toorangapuu maaori nei.
Heoi hei taa Harawira, e kore nei a Flavell e whakaae ana ki teera heitara aa ngaa iwi.
Ko Te Wero A Ngati Rangiwewehi
Me heke a Clare Curran mema paaremata mo Reipa mo ana whakawhiu i a Paora Maxwell, i a ia e kimi ana i te tuuranga toihau o Whakaata Maaori.
Koira te whakatau aa Ngaati Rangiwewehi.
I kaha werohia a Maxwell e Curran i roo paaremata, hei taa Curran, i he ai te tukanga whiriwhiri i a Maxwell hei toihau o Whakaata Maaori.
E ai ki a Ngaati Rangiwewehi, kaaore raatou e pai ana ki ngaa koorero a Curran, ka mutu, kei te aatete atu te iwi ki ngaa whakapae a Curran, kotahi anake te take kua hua ake a Maxwell hei toihau, araa naa tana hononga tata me te hiamana o Whakaata Maaori a Georgina Te Heuheu
Ko Te Toihau Hou o Ngaati Kahungunu
Kua huraina mai ai e Ngaati Kahungunu te toihau hou o too raatou Runanga.
Araa ko Adele Whyte tana ingoa.
I toona tikanga, he taakuta a Whyte, erangi naana te tuuranga toihau o te runanga i whakakii, whai muri mai i te hekenga o Meka Whaitiri.
Hei taa te hiamana o Ngaati Kahungunu a Ngaahiwi Toomoana, mai i te wehenga atu o Meka ki te whare miere hei mema mo te rohe o Te Ikaroa Raawhiti, naa Adele ngaa mahi aa te toihau i pikau, naa reira, he hua nui kei roto i tana kawenga i teenei tuuranga
Copyright © 2013, UMA Broadcasting Ltd
RELATED NEWS
