Listen Now: 
Tapihana Shelford
Teera a kapua pouri e taairi ake ana i runga i ngaa uri o Te Uri O Hau i te hinganga o too raatou rangatira a Tapihana Shelford.
Noo te ata o nanahi, i puta te koorero, kua hinga teenei tootara haemata e te toki o Aituaa.
Ko Tapihana tetahi o ngaa kaiwhakaihu waka o toona iwi o Te Uri Oo Hau, otira a Taitokerau whaanui tonu, ka mutu he minita hoki aa Tapihana i te haahi Raatana.
E ai ki ngaa koorero kei Ootamatea Marae toona tuupaapaku e tiraha iho ana i teenei waa.
Naa reira kei taku piki kotuku, kei te matua e Tapihana, takoto mai.
Kei Te Whakahe a Winston Peters I A Whanau Ora
Kei te whakamahia te kaupapa Whanau Ora hei whakatinana i tetahi pohewatanga mo te noho-a-iwi a te Maori ki tenei whenua.
Koira te whakatau a te kaiarahi i a Aotearoa Tuatahi, a Winston Peters.
Hei taa Peters, kaore te Maori i te noho-a-iwi i tenei ao, ahakoa koira te ahua noho i nga wa o mua, na reira, ko te whakaaro kia riro ma nga iwi a Whanau Ora e whakahaere, he whakaaro no te ao tawhito ke.
Hei tana, e titaha ke ana nga whakaaro o te Minita Whanau Ora, ara, o Tariana Turia, ki etahi iwi i mua i etahi atu, a, kaore hoki ia i te whai whakaaro ki nga Maori noho taone.
Ko Te Whakawhanaketanga Whenua O Te Uri O Hau
E tumanako ana te iwi o Te Uri o Hau, ma te koha whenua i te takutai moana ki te Kaunihera o Tamaki, ka whakaae te Kaunihera ki te hiahia o te iwi ki te whakawhanake i ona whenua ki Te Arai i te taha tonga o Mangawhai.
E wha tekau ma ono whare me te papa hahau poro ka whakatuuria e te Uri o Hau ki nga whenua o Te Arai.
I hoko te iwi nei i aua whenua i raro i tana whakataunga tiriti.
The Rangimoekaus
Hei tenei marama whakarewahia ai te whitiahua pakiwaituhi ahu tengi Maori tuatahi o te ao, ara, the first 3D Maori animated short film, ki te Ahurei Kiriata o Aotearoa ka tu ki Ngamotu.
Hei taa Helena Bethune, ko te kaupapa o te whitiahua nei, ara, o The Rangimoekaus, ko nga kotiro Maori pukukata tokotoru e whai ana kia mutu te mahi momi tupeka a to ratou kuia.
Ko Nga Tatauranga Torangapu O Te Wa
Kei te kokiri ano te kaiarahi takirua i te Roopu Torangapu Maori, a Te Ururoa Flavell, i te whakaaro kia uhia nga uri Maori katoa ki te rarangi pooti Maori ka tekau ma waru tau ana ratou.
Kei te tino whakahee a Flavell i te whakapae a Rino Tirikatene o Reipa, na te tohe a te Roopu Torangapu Maori horokukuu ai nga kaipooti Maori ki te hono ki te rarangi pooti Maori kia whai turu Maori hou ai tatou i te whare paaremata.
Heoi, kei te tino harikoa a Flavell ki nga hua o te Digipoll a Te Karere e tohu ana i tana toomua noa atu i a Reipa me Mana, engari, hei taana, ko te toa i roto i era atu rohe pooti Maori te mahi nui kei mua i te aroaro o te Roopu Torangapu Maori.
Ko Te Gluepot Reunion
Kua roa ia e ngaro ana i te ao waiata, engari, kua whakaae te manu tioriori Maori ra, a Mahia Blackmore, ki te waiata ki te ngahau Gluepot reunion, ka tu ki te Powerstation i Tamaki Makaurau a tera marama.
I rongonui ai te whare o Gluepot e hia ke tau ki muri, ko te katoa o ngaa kaiwaiata rongonui o Aotearoa i whakangahau i te marea i tera whare
Ka waiata tahi a Blackmore i te taha i a Hello Sailor me Dave Dobbyn.
Copyright © 2013, UMA Broadcasting Ltd
RELATED NEWS
