Listen Now: 
Ngaa Mangai Maaori O Nga Whare Waananga
Kia kii taurangitia e ngaa whare waananga o Aotearoa, kia whai maangai ngaa tauira maaori huri noa i ngaa poari whakahaere o ngaa Whare Waananga.
Koia te whakakipakipa aa te upoko takirua o te Roopu Torangapu Maori a Taariana Tuuria, whai muri mai i ngaa panonitanga ki ngaa poari whakahaere o ngaa whare Waananga o te motu.
Ko te panonitanga e maaharahara nei te Roopu Torangapu Maori, ko teera e kiia ana, kaaore he herenga kotahi maa aua poari whakahaere ki te aro ki ngaa hiahia oo roopu maha, peenei me ngaa iwi.
Hei taa te Roopu Torangapu Maori anoo, he raruraru nui teenei mo ngaa tauira maaori huri noa i te motu
Te Uepu Kaitiaki Ngahere Karauna
E matangurunguru ana te upoko o te Uepu Kaitiaki Ngahere Karauna, kei te katia nga whare o te Uepu ki roto i te Tai Tokerau.
Hei taa Angela Foulkes, kua tau te ringa o te ture ki runga i a ratou, no reira, kaore e taea te pehea, atu i te kati i o ratou whare e noho ake nei hei rauemi ki nga iwi e whakarite tono raupatu ana.
Hei taa Foulkes, kei roto i aua whare, nga taiwhanga hui, nga rauemi rangahau me era atu tumomo ratonga tautoko i nga iwi.
Te Moananui-a-Kiwa Ngarimu
Kua tohua e te Uepu Ngarimu VC me te Hokowhitu-a-Tuu te rua rau, e rima tekau mano taara hei rangahau i nga wahanga mau puu raiwhara o nga kaumpene e wha o te rua tekau ma waru.
Hei taa te upoko o te Uepu me te Minita i nga take Matauranga, a Hekia Parata, he putea tenei hei tohu i te whitu tekau tau i te whakamanawatanga o Ngarimu ki tana tohu ripeka wikitoria.
Hei tenei ra pare nei, mutu ai te wa tapae tono mo nga karahipi Ngarimu VC o tenei tau
Nga Pou Tara-a-waho Rino
Kei te whakangao putea tetahi Uepu Maori o Kirikiriroa, ki tetahi umanga whakatuu pou tara-a-waho rino ki nga whare.
Hei taa Glen Tupuhi o Te Runanga o Kirikiroa, e rima nga whare kaumatua i whakapuarehia i tera wiki, a, ko te katoa o aua whare, he mea hanga ki nga pou tara-a-waho rino nei.
Hei taana, he mama ake te utu mo te rino, i te utu mo te rakau hei hanga whare, me te aha, e whakapae ana ia he hua ka puta i taa ratou whakangao putea ki te umanga nei
Nga Karahipi Matauranga
Tekau ma tahi nga tauira o te kura pakihi o te whare wananga o Waikato, kua whakawhiwhia ki nga karahipi toru tekau o Te Putea Whakatupu Trust.
Tekau mano te uara o ia karahipi, a, ia tau whakawhiwhia ai ki nga tauira pakihi, whakahaere rawa ranei.
E ahu mai ana te putea mo nga karahipi nei, i te whakataunga rawa ika Maori.
Kaupapa Hanga Whare I Te Tonga o Tamaki Makaurau
Kei te whakatuu te roopu Te Kotahitanga o Tamaki i te toru rau whare utu mama ki te rohe o te tonga o Tamaki.
Kei te hoko te Kawanatanga i te whenua e tuu mai ai enei whare, ki Te Kotahitanga mo te waru ira kati iwa miriona taara.
Hei taa Tame Te Rangi o Ngati Whatua, kotahi rau miriona taara te uara o te kaupapa whakatuu whare nei, a, ehara i te mea,
kei te whakatuuria enei whare mo nga uri Maori anake
Copyright © 2013, UMA Broadcasting Ltd
RELATED NEWS
