Listen Now: 
E tupu haere ana te manawarere i Taamaki Makaurau mo nga whakaritenga whare a muri atu nei.
E ai ki a Naahinara me Reipa kia pupuri whare nga whaanau koia te huarahi kei te whakatairangatia.
Ko te raruraru kee kei te tupu haere te maha o nga taangata kaahore e noho ana i o ratou ake whare.
Kaati e mea ana nga kaiwetewete kia kaha ake nga kaitoorangapuu ki te aro ki nga hiahia o te tini manomano kei te reeti kee i o ratou whare.
58 paiheeneti o nga Maori i Taamaki kei te reeti whare no tetahi atu tangata te kaipupuri tuuturu o te whare.
He hononga pehea?
He kaupapa pai a Whaanau Ora engari, he kino etahi o nga whakahaere.
Hai taa Hone Harawira " kaahore nga hua o Whaanau Ora e turuturu mai ki te hunga e hiahiatia ana ki era hua ".
Koni atu i tera hai taa Harawira " he aawangawanga hoki te rerenga o te puehu i waenga i a Taariana Tuuria me Winston Peters mo nga tikanga tohanga puutea ki nga hootaka Whaanau Ora ".
Hai taana ano "i te waa e whawhai ana nga kaitoorangapuu Maori kei te oke tonu nga whaanau Maori ".
He maha nga patunga o te ruu i Pakistan.
E oke ana a Pakistan ki te aawhina i nga patunga o te ruu whenua i reira inanahi.
Neke atu i te whitu te kaha o te wiriwiri i te rohe tuuhaahaa o Awaran ki nga tatauranga o te waa neke atu i te 3 rau kua mate engari kei te rapu haere tonu i nga tuupaapaku ki roto i te tini o nga whare kua ngahoro.
Heoi ano na te iti o nga rongoaa he tino uaua ki te aawhina i te hunga whara.
He auau ake te tatuunga mai o nga huripari.
Kei te piki haere te maha o nga huripari e kitea nei i Aotearoa.
E mea ana a kaipuutaiao Taakuta Richard Turner " tata ki te tekau nga huripari kua tatuu mai ki konei i nga tau tata nei ".
Hei taana ano " kaahore e tino maarama ana ki nga pewheatanga a Taawhirimaatea he ahuatanga tera kei te rangahaua tonutia i tenei waa.
No reira e titiro ana a NIWa me pehea ratou e matapae wawe ana i nga momo aawha katoa.
Kua taka te Kapu.
Taihoa ake e toha puutea ki te whakataetae mo te kapu o Amerika a muri atu nei.
Koia te korero a te Kaawanatanga i tenei waa whai muri i te toa o Oracle i San Francisco i tenei ata.
He tere rawa to ratou waka no konaa ko ratou tonu te kaipupuri o to ratou kapu.
Ko taa te Piriimia a John Key i nga marama kua pahemo mena ka hinga a Aotearoa he uaua ake ki te hoatu puutea ki te tautoko i tetahi wero hou.
Kua huri te tai mo Reipa.
E anga atu ana te roopu Reipa ki hea?
E kii ana nga kaiwetewete toorangapuu kua kitea te aranga ake o Reipa no te pikinga o to ratou rangatira hou o David Cuniliffe ki tana taumata.
Ko nga tatauranga pai o te waa mo Reipa kei te whakaatu i tera kitenga.
Ahatia hai taa ratou ano e piikau ana a Cuniliffe i nga tuumanakotanga teitei o nga kaitautoko naana ratou i whakaawe ki roto i ana kauhau inakuaraa.
Copyright © 2013, UMA Broadcasting Ltd
RELATED NEWS
