Listen Now: 
Te whakapono me te hauora
Mehemea ka tangohia te whakapono o te tangata, ka pakaru te wairua, kaatahi ratou ka maauiui.
Koia te korero a Moana Jackson kairangahau Maori o Ngati Kahungunu i te hui o nga tohunga hauora ki nga motu.
Hai taa Jackson, kia tuu tangata te Maori ki te whakarite huarahi moona.
Hai taana ano, he aha o tatou moemoeaa, he aha o tatou tuumanako, aata whakaarohia he waahi pai ake, waihoki, me pehea tatou e waihanga tetahi waahi pera te ahua? Koia nga momo paatai hai whakaarotanga mo tatou ia raa, ia raa, ia raa.
Hai aha i a Pukamata?
He aha te tokomaha i huri tuaraa ai ki te ratonga rorohiko e kiia nei ko pukamata?
E ai ki etahi rangahau, he wehi kei wero poka noa te ihu o te tauhou ki o mahi.
Taapiri atu ki tera, kua hoohaa etahi ki te huakore o nga whakawhitinga korero.
Ka mutu, ko te taane me te hunga pakeke kei te mahue ki tahaki tera o nga haangarau korero.
Horekau he waahanga mo tatou.
Kua whakakaahoretia e te Taraipiunara o Waitangi te tono a te Maori kia arotakengia te hiahia o te Kaawanatanga ki te hoko atu o te ara tuaatea 4G.
Hai taa Amy Adams Minita Whakawhiti Korero, e whakahaere ana ratou i nga hootaka te tikanga kia kite ai te Maori i nga hua o nga haangarau hou engari, te hanga nei horekau he waahanga o te keke 4G mo tatou.
He rautaki pai a nga Piriihimana.
E whakapau kaha ana nga Piriihimana kia kore e tuu ki mua i te Kooti te nuinga o nga rangatahi e whakapaetia ana ki o ratou hara tuatahi.
Hai taa Wally Haumaha o te tari, tino whakaae nga kaiwhakawaa Maori ki tera kaupapa ko taa te Piriihimana he whakatuupato i aua rangatahi ka tohungia ranei kia hau atu ki to ratou iwi, ki to ratou runanga ki reira tirohia ai nga raruraru.
Hai taa Haumaha ano, he mahinga ngaatahi tera a te tari me nga roopu aawhina, tae ake ki nga iwi.
Te pooti mo nga waahine Maori.
Ko tenei te raa 120 tau ki muri i whiwhi ai nga waahine Maori mai, Paakeha mai, tenei taonga ko te pooti.
Ko tenei te whenua tuatahi o te ao kia whai pooti te wahine ahakoa ko te nuinga o nga rangatira toorangapuu i Aotearoa, he taane i enei raa.
Kaati i whakaaturia e Aotearoa i era waa te kaha ki te hiikoi i nga huarahi, kaore ano i hiikotia me te paanga wawe o te Maori ki nga puunaha a te Paakeha.
He pehea te rahi o te aroha?
Tapahia o koutou ake puutea mahi kia ahei te whakarite he utu oranga mo nga kaimahi puutea iti.
Koia te tohutohu a te Piihopa Mihingare o Poneke ki nga kaimahi whai rawa, he nui taa ratou puutea o ia wiki.
Hai taana he tohu rangatira te wahawaha o te ngaakau ki te aawhina i te hunga rawakore horekau he mahi koni atu i tera.
Copyright © 2013, UMA Broadcasting Ltd
RELATED NEWS
